Nakapagtataka. Pero Salamat.

Hindi kita tunay na kilala.

Hindi ko alam

kung ano sa iyo

ang nagpapatawa

o nagpapalungkot

o nagpapagalit.

Hindi ko alam 

kung ilang taon ka na

o may anak ka ba.

Ni hindi ko naisip

kung anong paborito

mong pagkain

o palabas

o gimik.

Hindi kita tunay na kilala.

Ngunit bakit ibayong lungkot

ang aking nadarama 

sa iyong pagyao?

Marahil dahil sa iyo

Ang aking Alon ay natutong

magustuhan at maunwaan ang matematika.

Marahil dahil naririnig ko 

ang tawanan ng mga bata sa klase mo.

Iniisip ko,

"ano ang nakakatawa sa math?"

Minsan sinabi ni Alon sa akin,

"Teacher plays Minecraft."

Alam kong ito'y kanyang ikinatuwa.

Nakapagtataka.

Hindi man kita tunay na kilala,

ngunit ibayong lungkot ang meron ako

sa iyong pamamaalam.

Higit sa pagtataka

ako ay lubos na nagpapasalamat.

Sa iyong tiyaga,

sa iyong gabay,

sa iyong pagmamahal

sa mga mag-aaral na sumilong 

sa iyong pugad.

Para kay T. Niven

10:03AM

13 May 2023